Misnøgd er í Fuglafirði, tí russiskir trolarar halda so nógvan gang. Mánanáttina lógu nógvir fuglfirðingar í andverki, tí ein russiskur trolari, sum umskipaði til eitt farmaskip, hevði so nógvan gang.
Í gjár fekk føroyski umboðsmaðurin hjá skipinum so boð um, at hetta bleiv ikki tolt eina nátt afturat, sigur borgarstjórin í Fuglafirði, Sigurð Simonsen, við Útvarpið.
Hann sigur, at hann tók hesa avgerðina í samráði við formannin í havnarnevndini og havnarmeistaran.
Russiski trolarin fekk boð um, at hann skuldi gevast við at umskipa klokkan 10 í gjárkvøldið. Arbeiðið kundi so takast uppaftur í morgun klokkan sjey.
Helt skipið líka nógvan gang, hóast tað ikki umskipaði, skuldi tað fara út á pollin at liggja í nátt.
Men bæði russisku skipini, trolarin og farmaskipið, rýmdu úr Fuglafirði í gjár.
Sigurð Simonsen, borgarstjóri, sigur, at gangurin frá trolaranum var verri, enn til ber at góðtaka í Fuglafirði.
