Fuglafjarðar hornorkestur

Nú eru 40 ár liðin síðan Fuglafjarðar hornorkestur varð stovnað, og í tí sambandi verður jubileumskonsert í Mentannarhúsinum sunnudagin 7. juni kl. 17:00

Í januar 1969 komu menn saman í skúlanum við tí ætlan at stovna hornorkestur í bygdini. Orkestur hevði verið í 50-árunum, og nú hildu teir, at vert var at royna av nýggjum. Endamálið var stutt og greitt, at vekja ans fyri tónleiki og spæla fyri fólki . Nevnd  var vald at arbeiða við hesum, og hon skipaði seg soleiðis: Arnold Abrahamsen, formaður. Jørgen Andersen, næstformaður. Finnur Olsen, kassameistari, Frits Johannesen, skrivari. Poul Jacob Hansen, nevndarlimur. Arnold var umframt formaður eisini dirigentur fyrstu árini.

Nevndin var sera virkin, tí longu í oktobur varð farið til Havnar eftir nýggju hornunum. Fyrstu ferð vit vita, at orkestrið spældi var í Hellutúni ein av adventsdøgunum 1969. Árið eftir vóru longu  fleiri framførðslur, og grundarlagið var lagt undir føstu uttandurðaspælingarnar. Longu í 1970 var orkestrið við á Musikkstevnuni, sum var á Glyvrum. Í 1973 vóru fuglfirðingar vertir fyri stevnuni.

Øll hesi ár hava mong spælt við orkestrinum. Onkuntíð var so væl statt, at tvey orkestur unglinga og vaksnamannaorkestur spældu.

Vit  skulu eisini nýta høvi at takka tykkum, sum fingu gongd á. Tað var ikki til fánýtis -tað vakti sanniliga ans fyri tónleiki. Hetta hevur verið til gleði og gagns fyri mong.

 

[04.06.2009 – Jóhan Joensen]