Gandi komin á Fuglafjørð
Kl 13 í dag 12. mai kom eitt skip afturat flotanum í Fuglafirði. Hornorkestrið spældi, og nógv fólk var møtt upp at taka ímóti. Skipið verður klárt at fara til fiskiskap um 2 – 3 vikur.
Tað er Jón Nolsøe Olsen, sum hevur keypt Gandi, sum er ein rækjutrolari, ið er komin úr Íslandi. Trolarin, ið ætlandi skal hava nýtt navn, skal fiska burtur av føroysku rækjukvotuni í Barentshavinum og við Svalbard.
Trolarin er 60 metrar langur, 13 metrar breiður og lastar umleið 400 tons av rækjum. Hann er bygdur í Norra í 1986, men er í løtuni heimahoyrandi í Íslandi, og ber navnið Gandi.
Sambært nýggja reiðaranum er skipið í góðum standi, hevur nýggjan motor og nýggja verksmiðju umborð.
Jón sigur, at hann vónar at sleppa upp í part í vaksandi uppsjóvarvinnuni, eins og flestu aðrir.
Skipið er sambært Jón Nolsøe Olsen soleiðis innrættað, at tað er væl egnað til makrelfiskiskap, skuldi tað blivið aktuelt.
Smærri ábøtur skulu gerast á skipið, áðrenn tað fer til fiskiskap. Umleið 15 mans vera við skipinum. Og Jón Nolsøe Olsen ætlar sær sjálvur á brúnna.
Vit vilja ynskja Jón og manning til lukku við skipinum, og blíðan byr frammyvir.
