Í morgin 28. september verður standmyndin av Victor Danielsen avdúkað.Hans Pauli Olsen er so avgjørt ein av okkara mætastu listafólkum.Hann er borin í heim í Tórshavn í 1957 Pápin var skipstimbrarin Esmar Olsen og móðirin Ebba, fødd Joensen Hann er giftur við myndakunstnaranum Hjørdis Haack, sum ættað er úr Svøríki og eiga tey børnini Femju sum er 14 ára gomul og Elias sum er 13 ár.Tann lítillátni myndahøggarin Hans Pauli Olsen, hevur síðani hann fór á listaháskúla í Keypmannahavn, í seinnu helvt av 1970 árunum, verið búsitandi í danska høvuðsstaðnum. Tætt við sín bústað hevur hann eitt atelier, sum hann kallar garasjan, har hansara hugskot eisini taka skap – sum oftast í bronsu ella leiri..Hans Pauli er sera nógv umbiðin myndahøggari, nærmast einaráðandi av virknu myndahøggarum í Føroyum í løtuni. Bæði í Føroyum og í Danmark fær hann hópin av bíleggingum, og hansara verk príða bæði føroyskar og danskar býir, umframt ymsar bygningar, eisini í báðum londum.
Á Handilsskúlanum á Kambsdali hevur Hans Pauli verið við til at seta dám á hugnaliga felagsøkið við standmyndum sínum. Uppi undir loftinum hanga tríggjar persónsspegilsmyndir.
Enn einaferð skal hann prýða bý okkara, hesaferð er tað ein minnisvarði av mentamanninum og trúboðaranum Victor Danielsen.
Standmyndin verður uppsett í vakra økinum í Tøvugili, ein virðiligur varði við høvuðsvegin, sum kemur at bjóða fólki vælkomnum til Fuglafjarðar.
1 Kvinnuspegilsmynd undir loftinum á Handilsskúlanum á Kambsdali.
2 Kvinnuspegilsmynd undir loftinum á Handilsskúlanum á Kambsdali.
2 Spegilsmynd av mannskroppi undir loftinum á Handilsskúlanum á Kambsdali.
[27.09.2008 – Jóhan Heri Joensen]
