Hoyggingartíð

Farið er um Ólavsøku, og komið er út í august mánaða, nú er tíðin komin til at bjarga vetrarfóðrinum.Sítt stendur grasið men enn hevur terrin ikki verið tann besti. Fitt er enn eftir av summarinum, so roknast má við onkrum góðum døgum afturat í ár.

Ein av góðveðursdøgunum í farnu viku brúkti Mortan til at fáa grasið til høldar.Veðrið  var gott, men tokan hekk yvir fjøllunum, hógvurin varð tí ikki so  turrur sum ynskjast kundi, men skjótt gekk fyri seg nú maskinmegin ger  alt arbeiði.

Nógv er broytt síðani abbin við rívu í hond og fleiri  hoyggingarfólkum ofta brúkti mánaðir til at bjarga hoynum, og til í dag  har maskinmegin eftir einum degi slær og ber til høldar frá einum nógv  størri økið.Tað er ikki langt frá, at sigast kann, at mannahond ikki hevur rørt nakað hoystráð.

Bóndin er arbeiðsleiðarin, sum tøkur skal verða allastaðni í senn, meðan maskinurnar gera arbeiðið.

Har traktorurin hevur rakað upp í rúgvur, so klárt er  hjá pakkimaskinuni at taka, har samlast másar, tjøldur og annar  heiðafuglur. Her borðreiður náttúran við sniglum, maðkum, ormum og øðrum  etandi.

[06.08.2006 – Jóhan Heri Joensen]