Kommunalt

Hesin bólkur er ætlaður at vísa alt kommunalt virksemi.

Vinna

Alt sum hevur vinnuligan áhuga er ætlað at hýsa í hesum bólki.

Ítróttur

Nógvu ítróttargreinarnar hava henda felagsbólk.

Mentan

Víða hugtakið mentan verður hýst í hesum yvirbólki,

Tónleikur

Alt innan tónleik.

Heim » Fiskivinna, Politikkur, Útvald

Fiskidagarnir avgreiddir við teprum meiriluta

Lagt út av tann 17/08/2011 – 15:46

Fiskidagarnir verða skerdir millum 10 og 20 prosent næsta fiskiár

Løgtingið hevur fyri løtu síðani við triðju viðgerð endaliga samtykt fiskidagarnar næsta fiskiár.

Aftur við triðju viðgerð varð uppskotið frá Johan Dahl, landsstýrismanni, samtykt við teprum meiriluta. 16 atkvøður vóru fyri og 14 ímóti. Ein atkvøða var blonk. Tað merkir, at fiskidagarnir hjá útróðrarflotanum verða skerdir 20 prosent 1. september, tá nýggja fiskiárið byrjar, og 10 prosent í hinum bólkunum.
Eitt broytingaruppskot frá Bjørn Kalsø, Jacobi Vestergaard, Jenisi av Rana, Karsteni Hansen og Kára P. Højgaard um at skerja fiskidagarnar fimm prosent, fall. 13 atlvøður vóru fyri og 17 ímóti. Ein atkvøða var blonk.
Áðrenn tingið fór undir endaligu viðgerðina av fiskidøgunum í dag, skrivaðu 17 tingfólk undir eina semju um, at tey fóru at atkvøða fyri uppskotinum frá landsstýrismanninum í fiskivinnumálum, treytað av at hann leggur fram uppskot um brúksskyldu av fiskidøgum.
Tey, sum skrivaðu undir avtaluna,  vóru Magni Laksáfoss, Edmund Joensen og Helgi Abrahamsen úr Sambandsflokkinum, Poul Michelsen úr Framsókn, Sjúrður Skaale, uttanflokkatingmaður, Torbjørn Jacobsen, Bjørt Samuelsen, Høgni Hoydal, Annita á Fríðriksmørk, Bergtóra Høgnadóttir og Hergeir Nielsen úr Tjóðveldi, Hans Pauli Strøm, Jóannes Eidesgaard, Eyðgunn Samuelsen, Andrias Petersen og Katrin Dahl Jakobsen úr Javnaðarflokkinum, og Kári á Rógvi úr Sjálvstýrisflokkinum.
Uppskotið um brúksskyldu verður lagt fram fyrsta dagin, og ætlanin er, at brúksskyldan skal koma í gildi longu í fiskiárinum, sum byrjar 1. september.